Buxtonians must stop this train
Bluetoothers know de plenty rich history of Buxton including de many internationally known Guyanese who come from deh. De nice hard-wuking people life get lil mess up when some ruthless bandits, reportedly taking orders from some Opposition members and dem mouthpieces in some section o’ de media, invade de place and de dem life. De gunmen spread fear not only to Buxtonians but to other people. Plenty innocent one get killed. People use to frighten to travel up de East Coast.

De bandits and dem backers even seh that de village should separate from de rest o’ de country. Food and drinks could go in. GPL couldn’t read de meters. Yet de Opposition members could enter freely! Now things different. De police didn’t give up even though some o’ dem own get killed. Dem and de soldiers get rid o’ de bandits. Peace returned. Development projects continued. Buxtonians happy. Everybody driving fear-free up and down de East Coast. Meters getting read and food and drinks plenty.

De stories heart-wrenching what innocent hard-wuking Buxtonians went through because o’ de bandits. Nobody ain’t more happy than de Buxtonians now that peace return. Dem get dem life back. Dem can go peacefully to dem farm in de backland that now gat improve drainage and so on. Dem getting plenty market fuh dem pumpkin and other eatables. Uncle Bharrat visit de place and was given a home-boy welcome. He visit Buxton just like how he does visit all over. De bandits friends blue vex that he visit and that people happy.

Everyday dem crawling out dem hole blaming Uncle Bharrat fuh visiting de place and de Buxtonians fuh welcoming he. Never did de Bluetoother hear such Judas-two-face-selfish response from accomplices to mayhem! Dem ain’t want de place fuh develop. Dem ain’t want good things fuh Buxtonians. De Buxtonians hospitality mek de accomplices look like fools. De Buxtonians must mek dem remain fools. Stay with progress. Put a halt to de sourpusses who trying to keep down. Put a stop to dem band-wagon. After all, Buxtonians didn’t know fear when dem stop de train! Hmmm!