Emancipated, yet some ‘constipated’
DE BLUETOOTHER extends Emancipation Greetings to all. It’s soiree all over, and everybody dressing up in African print. Minister Ali dress up too; he always dressing up fuh all de national occasions. A Bluetoother seh as de Housing Minister, he must ‘house’ he’self in de many outfits. Anyway, it look good; fuh dress like that cost plenty money. Dem outfits expensive!

People now gat plenty disposable income; dem buying cars, house, brand-name clothes, modern appliances, outfits and so on. Years gone back, dem couldn’t do that; dem ain’t had money. Now with de economy growing, people prospering. De freedom since ‘92 mek things freely available, and people free to buy. We now gat real emancipation.

But not everybody happy with this emancipated emancipation. No! Some ‘blue’ vex. Uncle Freddie and Glenn and de rest o’ de five old sourpusses vex with the progress and freedom. Dem bad-talking, sehing suh much garbage that de city now full with it. But dem comfortable with de stench; dem feel at ‘home’! Dem stuck in de past and can’t see and accept de many positive changes that Uncle Bharrat engineering.

Hydro-power coming; new highways coming; computers coming fuh everybody. New ferries coming. That is only a few. Dem boys just can’t tek it. Dem stuck suh much in de past till dem leff constipated. Laxative gat a reverse effect pun dem. Dem miasmic matter does defy gravity and head up. But even that is a sign o’ real emancipation. Dem free to talk!

With de freedom, plenty people investing. New banks and fast Internet is de latest. Today, de ‘Blue Power’ people get a new CEO. ‘Uncle Joe’ now free from de position. Yog tek over. E-magine teking over pun Freedom Day! E-magine de many possibilities fuh further advancement. Freedom to advance. Uncle Bharrat always talking ‘bout it. Suh, move over sourpusses. De shackles free since ‘92!

Bluetoothers just hope that de Mayor heed de sign pun Brickdam and emancipate we from de garbage. Maybe is time fuh we get emancipated from City Hall. De Mayor seh he gon clean up pun August Monday. But he ain’t know that August Monday is today; a Sunday! Trust de Mayor: He stuck in de past. He constipated, too. He ain’t know that August Monday no longer exists. Get a laxative Hammie! Give Freddie and Glenn, too. Phew!!! Oh Shucks! Don’t do dat! Is more garbage gon be forthcoming! Hmmm!