GT Bluetooth
De Bluetoother see de All Fuh Crap (AFC) had a launch fuh de upcoming elections. Well, from how things turn out, plenty  people confuse. Dem ain’t know if it was a launch or a lunch. Everybody know that when a election launch happening, is plenty nuff people does attend. De event does tek on a different look. Yuh does know that a Party “partying’. Boops, de  thing more silent than silent movies and only a handful o’ people attend.

Dem boys seh that only de organisers and de hotel staff did present. People that pass by think it was Sunday brunch with de  Guyana Cricket team since only lil bit turn up. Even if de two faction o’ de DCB did turn up, only thirty chairs was  necessary. It look like people really tek de All Fuh Crap message serious and turn right from de Party! Dem turn away.  People ain’t even budge much less turn. De members de Party claim it gat never turn up. Apparently, dem never had it.

De launch expose de party. De membership ain’t gat members! One boy seh that when de RumJHAATan was to speak, he thought he  wasn’t seeing right. He expect fuh talk to plenty people, not only to de guards and caterers. De same man seh how Raphael  trotting up and down in panic while Shelia did holding on by de gate fuh look fuh de plenty who turn away from de Party.  Thinking that she also not seeing right, she clean she glasses steady steady. Same result. She ain’t see people.

De launch turn out to be a lunch. Plenty food leff back. Even de RumJHAATan, Raphael and Sheila leff dem own. Dem was  plenty embarrass to eat. One insider seh that de All Fuh Crap choose de hotel because dem didn’t want a outside event since  de last time de stage collapse. Now, de launch collapse like a damp squib. It look like de GRA ban pun squib really wuking.  It put a damper pun de launch…ooops, sorry, lunch! Hmmm!