India playing games with de Games
Bluetoothers anxious ‘bout de Commonwealth Games coming up. With a couple days left fuh de opening, it ain’t sure if de games gon come off. India had four years fuh prepare and to build whatever dem had to. De time pass and nuff wuk still ain’t done. Some things that dem build actually fall down! A big iron bridge and de whole ceiling fuh one o’ de venues fall down. People get injured. Athletes concern ‘bout dem comfort and safety. Teams pulling out. India looking bad.

Reports seh how homeless people and dogs living in venues fuh de games and that human excrement and other waste deh all over. Some seh that this kind o’ thing very uncommon fuh de Commonwealth Games and fuh India. De country is a super-power; a economic super-power. De IPL show de class de country gat. Dem send rocket to space and gat de biggest film industry in de world! Yet dem can’t get things right fuh de biggest sporting event fuh de Commonwealth!

A lil country like we own had less than one year fuh prepare fuh de biggest cultural event fuh de Region, CARIFESTA, and we pull it off with flying colours! Fuh World Cup Cricket 2007, we build a brand new state-o-de-art stadium and host super-eight matches. Our security boys do so good that dem gat call fuh wuk de finals in Barbados. Lil Guyana do this. Yes Uncle Freddie, lil Guyana.

It was successful because Uncle Bharrat led from de front. He left nothing to chance. Today we can bask in de glory. If Guyana was hosting de games and get all dem problems that, you could e-magine Uncle Freddie and Glenn response. So if yuh see Uncle Bharrat heading to India soon, don’t be surprise. Know that is Mr. Manmohan Singh, de Indian PM invite he to fix things fuh de Commonwealth Games. After all, Uncle Bharrat did get it right! Hmmm!