Dem boys using plenty DEC salt
Bluetoothers wary of Uncle Glenn obsession with Fip. De way Glenn nagging Fip yuh might believe dem “married”. De thing looking like a soap. Not salt soap nor sweet soap; TV soap. Everyday people does tune in fuh “Restless” and “Laali” and so on. Glenn, not wanting fuh be left out, open a soap factory meking one brand; Fip. Apparently only Glenn and dem boys “using” it. A Bluetoother seh other people ain’t want to use a soap that name after a man. But that is another story.

Ever since Fip get de contract fuh build de road to de hydro, Glenn after he. A lady Bluetoother seh she envy Fip. She wish a man was after she like that. She still looking. Glenn looking long fuh Fip and he equipment. De equipment come. Glenn didn’t waste time. He hire a boat just fuh get a close up view of Fip equipment. De same lady Bluetoother seh she now envy Glenn. She wish she could get close to a man equipment. But that also is another story.

Glenn and he boys dem following de equipment down in de jungle. Fip seh while he happy that de boys dem gon provide “security” fuh de equipment, he lil uncomfortable that dem “watchmaning” he thing. He tie a big piece o’ red cloth pun he thing. That is to keep off “bad eye”. Dem boys arguing as to who gat “bad eye”. Dem blaming Uncle Adam. Dem seh he is de “culprit” since he always putting wrong things in de Waterfalls paper. While dem arguing, Fip equipment barging ahead.

Fip proud o’ he equipment. It big. Big equipment fuh a big job. Bluetoothers curious. Dem want fuh know why Glenn and he boys after Fip big equipment. Is like an obsession. A possessive Bluetoother seh Glenn probably gat obsession fuh big thing. It look more like Glenn and he boys gat some kind o’ hydro symptoms. Some men does get certain symptoms with dem “hydro”. Dr. Lee use to provide relief. Now that he no longer providing de service, Glenn and he boys gat another option; DEC salt! What a soap in de making! Hmmm!