Plenty progress and six sourpusses
Bluetoothers ain’t blind. Dem could see de very many plenty development that tek place here over de last seventeen years. Now it gat things that never was. It call progress. It gat freedom, pipe water, hospitals and clinics, schools, computers, roads, street lights, plenty new hotels, new housing schemes, stadium, nuff vehicles and every things else Forbes did ban. It even gat garbage, a useless Mayor and about six sourpusses.

Fuh de sourpusses, nothing happen since 1992. Yet all six gat big fancy house and vehicles which dem never had before! A Bluetoother seh that de plenty garbage de Mayor decorating de City with is a big sign o’ progress since people now can afford to buy and throw away things. Long ago it ain’t had garbage since people, including de sourpusses, couldn’t afford to buy anything.

Now, even de stores dem opening till late night time fuh accommodate de shopping masses and is not even Christmas! Frustration is something that drivers now gat. Dem can’t find parking since de all over full up day and night. De six sourpusses that does lime by de Waterfalls paper, vex with de progress. If dem write ‘bout it de paper ain’t gon sell since people can see de progress and don’t have to read.

So dem write other things bad-mouthing de progress fuh mek a living. Imagine one o’ de sourpusses use to mek a living editing de state paper when de Coconut Tree party misrule de land! So if yuh see de sourpusses walking with white canes in Port Mourant, know that dem ain’t going to Babu John. Dem going to de Eye Hospital. Maybe Minister Bherri can help dem so dem could get it right; their eyes that is! Hmmm!