Some men now using ladies lotion
Since yesterday after de Bluetoother “skin-up” de names of three of de five old men who always “negativeatising” Guyana, de Bluetoothing traffic increase ten times more than that of Camp Street and dem bank lines. De increase is because de three men Bluetoothing all deh relatives and friends to seh that dem is not de old “scratchity” men in question.

But people know different. When people guilty dem does “jump up and down” in denial. Now with plenty advancing technology in Guyana, de denials Bluetoothing faster than de Roop getaway after he get catch peeping de young girl. Some even denying that dem old pun Facebook even though dem ain’t gat face fuh de book.

De “old” title really hurt Uncles Freddie, Adam and Chris Ram. De other two frighten dem names gon call. One Bluetoother even suggest that de Blue Power people pun Brickdam should have a texting promotion to name de other two. This promotion can mek de company mek back de money dem lost to internet cafes.

Right now all dem pharmacy glowing in profit from sales of lady creams that does mek yuh look young. And is not ladies buying it! Is de men dem who think is dem Uncle Bharrat talking ‘bout! De men dem creaming more that ice-cream. Dem turn white white.  Even cucumber and papaya sales gone up cause de same men dem putting it pun dem eyes and face fuh look young.

So if yuh see somebody white, tek a good look. It mightn’t be a Caucasian nor a ghost, it might be Uncle Freddie, Uncle Adam or Uncle Chris Ram. If yuh see dem with spectacles mek out of cucumber yuh gon know is one o’ dem. In Chris Ram case, it might be a bit easy. Look fuh a man with he pants down. He get catch with he pants at he ankle after the Main street hotel scam! So much fuh suspenders. Hmmm