Charge Hammie fuh littering
Bluetoothers still corking dem nose. Parts o’ de City still stink. Plenty stink. Not because de people dead and can’t “represent” themselves mek Hammie must tek he eyes and pass them. It shows that de “should-be-booted-Mayor” ain’t gat respect fuh anybody even de dead! E-magine Hammie telling people to put disinfectant in dem garbage and tie it up suh it could stay lil longer and don’t smell.

Ah know that de Blue Power people seh “E-magine de possibilities”, but who could e-magine de endless garbage de Mayor telling people when HE gat de responsibility fuh clean de City!! Why not clean de City and spare de people de expense fuh de disinfectant and de stinkness? He always sehing that de council ain’t gat money suh steady Uncle Bharrat gat to rescue de workers by paying dem salary.

Everyday money collecting from pavement vendors and market stall-holders plus rates and taxes and so on. Suh how come money never deh fuh pay de garbage collectors? It look like is real RATES and TAXES. De residents getting rat out with garbage while Hammie grinding axes. He always gat time fuh write long letters in de paper grinding axes and fuh travel over de world. He does write using he real name and sometimes a false one.

De false name ones does get publish in de Waterfalls paper even though de paper seh that letter writers must put real name, address and phone number. Ah wonder where Harry Gill live? It look like Uncle Adam “covering” fuh Hammie/Harry. Ooops…de cat out de bag! Enforce de littering laws Uncle Kellawan. If is $10,000 fuh dropping a sweetie paper, then Hammie gat plenty $10,000 fuh pay fuh de amount o’ garbage he leff in de City? Somebody call de Police! Now!

If yuh see Hammie running, know is de dead people in de cemetery rebelling. If yuh see he with a garlic garland, know is de “spirits” he trying to repel as dem haunt he fuh stinking up dem resting place. Hmmm!