GT Bluetooth
DE Bluetoother  get plenty response since it expose what tek place during David selection at Congress Place. Some calling he ‘Ballot Box David’. Some calling he ‘Corbin Boy’. Faith, Basil, Carl and James calling he ‘selectee’. David getting vex with dem names. De four losers and dem supporters know that David does get vex fuh anything. He full o’ anger. David seh anger is part o’ he. It with he since he know heself. It even in he name; grANGER! Faith ain’t taking chance. She join he since she can’t beat he. She ain’t want leff to wonder. She and de others can’t get over how he win. Carl was sure it would have been he. He now wondering what to do.

Basil wondering if he gon still be a MP after de election. Well James, it look like nobody ain’t wondering ‘bout he. De Congress Place loyal wondering ‘bout David. Oscar and others wondering if he coming with he ‘slingshot’.  Amna wondering what he might put in de ‘slingshot’ if he bring it.

Uncle Corbin wondering how de comrades gon address he in front o’ David.
David wondering ‘bout de opposite and where he office gon be. Dem who gat office in de bushy HQ, wondering who gon be asked fuh give up a office fuh David. Is sheer wondering. Raphael wondering what he gon tell de public when he go back to Sophia. Sase from de All Fuh Crap wondering what he gon blab he mouth about when Raphael go home to he comrades at the Coconut Tree party HQ.

Uncle Corbin and David know that dem gat to wuk plenty wonders if dem fuh come any way close to smelling victory. Dem also know that dem ain’t gat any skill like de man who wuk wonders and calm de sea and feed thousands with just five bread. So dem wondering how fuh wonder. So if yuh see de two o’ dem walking and looking up in de sky, don’t wonder. Dem looking fuh a sign. Dem ain’t seeing none. De forecast fuh dem is heavy overcast with dark clouds. It gon tek a wonder fuh see through. Hmmm!