GT Bluetooth
De Bluetoother following de Laptop story. Uncle Bharrat giving some ninety-thousand Laptop to families. He want fuh mek Guyana de most computer literate country in de world. It ain’t hard. De country gat far less than a million people and plenty already gat and know fuh use computer. Dem who ain’t gat a computer know fuh Facebook and Google pun dem cell phone. Suh Uncle Bharrat task ain’t hard and seeing that it spread over three years, it much easier fuh do.

People glad fuh de Laptop since children who ain’t gat access to computer gon get a chance fuh learn. Even de old people who never use de thing gon get a chance. With all de plenty information pun de internet, soon everybody gon be playing “Jeopardy” with each other. No longer dem gon ask, “who is de President o’ China?”, dem go seh Hu IS de President o’ China.
Unfortunately, two people ain’t gon be able to play even though dem gat more than one computer.
De two is Uncle Glenn and Uncle Adam. Dem can’t play since no matter what learning programme de country gat, dem can’t learn. Is not hard headed dem hard headed, but just like dem bosses in de hOpposition, dem ain’t want fuh learn. E-magine, de two Uncles bad talking everything de guvment do as dem hide as ‘Investigative Journalist’ (IJ). De nice lady Minister, Jenny Webster, innocently quote a wrong figure fuh de cost o’ one Laptop. Big headline appear in de Waterfalls paper as if de thing really suh expensive.

If dem was really IJs as dem claim, dem would a divide de money estimated to buy de Laptops by de amount to buy and dem would a realise that it was a genuine mistake and that de thing far far cheaper than what dem mek it to be. Even deh Opposition ain’t do that, Volda, Debbie and Norton included. De truth is, Uncles Glenn and Adam can’t divide! Dem and deh Opposition ain’t know long division! Fuh dem, one and one is eleven! De Bluetoother hear that de nice Jenny will be generous and share out hats in de House and at de Waterfalls paper. De hats gat a brand; DUNCE! De IJs now gon be Imbecile Journalists! Hmmm!