Ashni ‘slam-dunk’ de ‘kangalangs’!
De Bluetoother and everybody else calculating how much more dem take home pay gon be from this month. De Budget increase de tax threshold. It mean more money and it come quick quick after de 5% increase fuh Christmas gone.

Is increase pun increase. Christmas gift in January! Old people getting mo money too. Suh Uncle Adam happy. He old-age pension increase. Uncle Freddie not too happy though. He not certain if Uncle Glenn gon give he de 5% increase. Dem boys seh he threaten Glenn. No increase; no butt kissing!

Dem same boys seh Glenn gon give in to Freddie demands. Don’t ask why. It look like Freddie like what he do and Glenn like what Freddie do. With all what dem did and doing, dem didn’t expect Uncle Ashni fuh drop de thunderbolt last Monday. De 2011 Budget suh big that Uncle Ashni tek lang fuh read it. De Budget mek Freddie and Glenn and de rest o’ de “kangalangs” look mo stupid. All de time dem only sehing how de country deh bad and nothing happening.

Uncle Ashni wait fuh dem and from de “three-point line”, “bam”. Then from straight across de court and on de “hoop”, “bladam”; “slam-dunk”; game done. “Kangalangs” lost by wide margin.

De Budget seh it all. If things as half as bad as de “kangalangs” and Carl De Green and Uncle Corbin harping, then how come de Budget ain’t gat new taxes? How come de income tax threshold raise? How come pension and public assistance raise? How come de Budget increase by some 14% from 2010? How come de economy continue to grow? How come, Eh?

De “kangalangs” frighten de truth. Dem can’t handle it. De truth is vision, good management, inclusiveness, transparency, accountability, care and so on. Words that not associated with de “kangalangs”.

What dem not telling people is that dem taking home more money too cause de Budget is fuh everybody, “kangalangs” including. One from Sophia seh is a election year Budget. Wha he want? No Budget fuh 2011?

Because is election year it mustn’t gat Budget? He and de other “kangalangs” did calculating dem increase in old-age pension as Uncle Ashni Speak. Don’t expect dem fuh play basketball anymore! Hmmm!