De Peg-uhhh-shucks getting snow
Bluetoothers like to party. Not only at Christmas time but anytime. Now-a-days is plenty party. Not only political ones but “glow party”, “school uniform party fuh over forty”, “don’t wear nothing party”, “after dark party”, “all pink party”, “bring anything party” and so on. Is almost everyday is one o’ these party and dem always full. Of course yuh have to pay fuh go in unless yuh is a VIP; Very Interested in Party. De VIP yuh get to drink VIP; Vodka In Pepsi.

While some party admission price fairly cheap, some really expensive. A particular place gat de most expensive price tag; a minimum o’ thirty thousand all year round! A pessimist would seh it too expensive while a optimist would seh it free, depending how yuh look at it. De place gat a “eye-popping” feeling about it depending pun how yuh look at it. De same person that own it, own a fast food place with a “eye popping” name. De place is de Peg-uhhh-shucks.

Guests seh from de time dem check in, dem in a “all white” party; snow. Dem who get away from de snow vex that dem butt up with more snow at de Peg. De good thing with de Peg snow, is that de guest gat control over how much dem want! De snow start from de time dem put on de TV and stop when it turn off! E-magine a big expensive place like that ain’t gat cable when thousands ‘o ordinary people gat! All de channels snowing! Even de two local ones; half dozen and half dozen plus three.

Visitors vex. Fuh see TV some does ask de taxi driver fuh carry dem to he house fuh watch cable so dem can see Uncle Barrack campaigning fuh mid-terms. One vex visitor who end suffering from over exposure to snow, seh de snow at de Peg is a environmental disaster. He get he office in de Big Apple fuh send some rock-salt to help “melt” de snow and don’t mek if form “ice”. So if yuh see de Peg Robert with rock-salt and a spade walking round de place, know is snow he melting. He love to party; “snow party”. Hmmm!