GT Bluetooth
BLUETOOTHERS excited about the recent discovery of dinosaurs in de heart o’ GT. Archaeologists from all parts o’ de globe rushing here. De planes dem full. Long lines at JFK and all de other big airports around. News networks in Uncle Obama country had breaking news ‘bout de large crowds at de plane stations. De first thing dem report was a reportedly terrorist attack that mek de plane dem grounded. Some reported different story like de gulf oil spill over pun de runways; de runways using to film de sequel to de movie 2012 and that Elvis returning to de building so everybody turn up fuh see he. In de end dem get it right after Bheri intervene. Big story. Dinosaurs spotted in Guyana. Research show that de story not really new. De oldness o’ de story show that some o’ de local media not in tune with what going on.

Long now Uncle Bharrat sehing that five dinosaur live here. Even though he didn’t name dem, people know dem. Some playing dem ain’t know because de dinosaurs is dem friend. Everybody know that City Hall gat a dinosaur that weigh a hamilTON. De Waterfalls paper gat one; a Freudious TARNISHarous. De labour movement gat one; a Linkonous Loudmouthous. Just like long ago, dem present-day dinosaurs stuck in de past.

Dem don’t like things new and modern like hydro, stadium, laptop fuh children, highways, fast internet, street lights and so on. Dem like blackpot, jug-lamp, pothole, donkey cart and so. So dem send a dinosaur, a Chemrajous RUMJARratanus, fuh try and see some people in de States with de hope of preventing de hydro. Now only a dinosaur wouldn’t know that Uncle Bharrat is de head here and can mek big decision and that Uncle Obama want alternative fuel.

E-magine if de millions at dem airports overseas waiting fuh come here to see dinosaurs know that de Campbellville based RUMJARratanus walking de streets o’  Washington DC, dem might save some money. Tune in, Breaking News, “Guyanese dinosaur found still colonised”. Hmmm!