GT Bluetooth
Bluetoothers bouncing pictures of people who wearing space suit and who look like dem walking pun de moon. De only thing is not de moon dem walking pun nor is de oil spill in de gulf dem cleaning up! Is right here in GT dem walking! De suit is not to stop de use of umbrellas now that de rain pouring or to be pick-pocket proof. It is to keep out de stench. De stinking stench of parts o’ GT! De parts that Hammie stink up.

People can’t believe de amount o’ garbage City Hall could stack up. And it stink. It stink like de suspicion plenty people gat of what does go on there. Is everybody corking dem nose and condemning de Mayor fuh not doing he wuk. De thing fast becoming a health crisis. Hammie seh he gat a bail-out crisis. He waiting fuh Uncle Bharrat fuh bail he out. A Bluetoother did seh before that Uncle Bharrat should really bail out Hammie; out permanently!

E-magine de PRO o’ City Hall who does wear another hat over he space suit and who does sit right next to Hammie, ‘Echoing” that de garbage situation is dangerous! City Hall PRO sehing that! Hammie not hearing? He corking he ears rather than he nose? Ow Hammie, yuh nah gat shame? Yuh is de opposite to Midas. Midas mek things turn to gold while yuh mek everything fold. Yuh history is de Coconut Tree party show that yuh couldn’t manage anything.

De party yuh form fold up. City Hall now folding up in garbage. But how come, where yuh live, Hammie, clean clean and by everybody else stink stink? Now that de place might get clean once in two weeks if yuh lucky, look fuh de price o’ space suit sky rocketing up. If by chance yuh see some well-dressed GT citizens picking up garbage, know that dem ain’t easing de situation. Dem picking out special “pieces” fuh mek a garland fuh de real “Champion of Dirt”; Hammie. Hmmm!