Mr. “suspender” is like cat watching milk
BLUETOOTHERS can’t stop “bouncing” ‘bout de man who get catch with he pants down. No, not de certain man who had to jump through a window and get away; a man who does always wear suspenders. De suspenders buss because de weight of de underhand money he put inside. Only a construction crane can hold de money he get fuh selling a Towering GT hotel to somebody else rather than a man who deh in genuine hotel business long long.

Some seh when de hotel was “entrusted” to he and he was suppose to sell so de bank can get back dem money, he solicit money to sell he friend de hotel. Is nuff nuff money. De money so much that some foreign Bluetoothers “bouncing” images of de plenty fancy cars and houses de “suspender” man children showing off overseas.

Now de story buss out. To hide de truth, he get injunction to suspend reporters from writing ‘bout he skulduggery. By then, de real hotelier tek he to court fuh de corrupt deal he mek. This “suspender” man does write plenty things that de Big Market paper does pass fuh analysis in which he does accuse guvment of being undemocratic and not transparent.

Now he tek de hotel and mek it he own business through de corrupt deal he mek with he friend. Is like putting cat fuh watch milk! This is a man who does try to “suspend” progress. And is not only in de papers he sharing wrong information and hatred, but pun TV too, with he suspenders showing. Bluetoothers seh de “Ram” think he is Larry King. De only difference is that Larry does mek sense.

De way this “Ram” does “bad talk” de guvment, you would expect he more clean than de snowcone man whistle and more holier than Saint Paul. De real one; not de one some trying to mek a “saint” here. One Bluetoother seh now that he dirty bag get buss up, all de suspenders he can buy can’t hold up he pants to cover up what get expose. What? DEC salt can tek care of that? Hmmm!