Freddie cabal supporting slackness
De Bluetoother can’t believe that a set o’ people who claim that dem qualify as lawyers and academics protesting fuh Freddie since he contract get rescind. Freddie and he “academic” cabal trying fuh fool people that he get fired wrongfully by de guvment. What dem should tell people is that de guvment ain’t got nothing fuh do with de issue. Is de UG Council that mek de decision. De Council got all kind o’ people including from de hOpposition and a lil bird whistle that de Council decision was unanimous. That mean even people in de Opposition agree fuh Freddie contract get rescind!
De cabal not telling people that. Dem not telling people that Freddie get he new contract illegally. De same bird seh that de Vice man at de UG give Freddie he contract unknowing to de committee that does deal with that. De man know he was leaving that is why he do it. According to de UG rules, when yuh reach sixty, different things does apply, not only fuh Freddie, but everybody, including people with real PHDs. Dem boys seh Freddie is a PHD; Professional Homemade Dunce! Dem seh that title suit Freddie because since he wuking at de UG twenty-six years now, he never write a academic paper which is a requirement fuh de UG.
He want de job but he ain’t want wuk! Dem same boys seh that Freddie and “academic paper” don’t go in de same sentence except this one, and that he is no asset to de UG. He never produce anything fuh de journals there. He just collecting a fat salary fuh doing nothing! So a lazy, non-productive “PHD” got people protesting fuh support he. In other words, de protestors, including Chris de Lawyer and RumJHAATan, supporting laziness and mediocrity. That is slackness to de highest! That is not surprising because de hOpposition, of which Chris and de RumJHAATan belong, is known fuh not wuking but collecting even when dem was in office!
Dem supporting mediocrity and does turn around and try fuh blame de guvment fuh de standards at de UG. Again it not surprising to know that Freddie get de wuk when de PNC was in Office! Yuh can now see de link with de mediocrity and Freddie kind o’ “PHD”. Seeing that hOpposition people also vote fuh he contract get rescind, why de cabal don’t tek de protest to de Place of CONgress or at de All Fuh Crap office? Dem know that Freddie teking up space that a productive person with a real PHD can mek good use of. But dem want keep that quiet because de real PHDs gon show up de cabal mediocrity! Hmmm!