Some people teeth knocking with afrighteness
DE BLUETOOTHER know some people who really getting afrighten, and is not de Indian or de Sri Lankan cricket teams who scared of de response of fans if dem lose de World Cup now playing. No, is a set who always abusing others. De set include Uncle Freddie, Glenn, Adam, and Mark and Witter and Lincoln and de rest o’ de All Fuh Crap (AFC) posse. Since Uncle Bharrat tell de police dem must shoot to kill de criminals, de posse get very afrighten.

Uncle Bharrat even explain that is not a blanket order fuh de police to be trigger happy. De order is fuh shoot de heartless criminals that don’t think twice fuh kill innocent people. This kind o’ criminal all over de globe, and peace-loving people who paying de salaries o’ de police want de bandits dead. Guyana ain’t no different. When de bandits bruk out de jail and create havoc, everybody wanted dem dead. From de time a bandit lurk, people does call de September number, 911. Dem does call fuh help. De help mean kill de bandits.

Everybody know that de same set o’ bandits that escape was help by some in de hOpposition. Is de same set in de hOpposition does then turn round and seh that de guvment not doing enough fuh ease crime. So on one hand, dem support de bandits, and with de other, dem not supporting de guvment when it tek action. But what yuh expect from hypocrites, oops….de hOpposition. But why dem worried ‘bout de shoot- to-kill? Dem shouldn’t worry, it not dem gon get shoot. Dem gon only get shoot if dem is bandits. By de way, de shoot-to-kill thing is nothing new.

Remember Uncle Desmond did seh “Hang Dem High” which was he initials, H. D. Hoyte? He wanted de bandits dead. So does Uncle Bharrat and all peace-loving Guyanese. But not de All Fuh Crap and it posse. One Bluetoother seh de only reason de All Fuh Crap should be afrighten is if dem involve in things that might require de police fuh shoot. If dem guilty, then dem gat all reason fuh be very afrighten. If yuh see de posse passing by with dem teeth knocking, know is not only cold dem cold; dem might have reasons to be afrighten of cold steel. Hmmm!