GT Bluetooth
De Bluetoother notice how de boys dem at de Waterfalls paper fighting up fuh do dem wuk as de hOpposition. Everybody know that de paper is now part o’ de official hOppostion. Suh just like any hOpposition, dem gat to seh things to bad-mouth de guvment just fuh de sake o’ bad-mouthing. De paper is now a political entity with Uncle Glen as de “presidential candidate” and Uncle Adam as de “prime ministerial candidate” with Uncle Freddie meking de third wheel as part o de paper “A” team; de “A” stand fuh Asses!

Is everything dem trying fuh oppose even though dem end up meking themselves fools. It ain’t different from de real hOpposition. It easy fuh fools fuh attract fools! Only fools like de “A” team above and dem friends in de All Fuh Crap (AFC) would want fuh prevent some Seventeen Thousand Pensioners (STP) from getting dem money every month. De All Fuh Crap lady, Sheila, hold on that de pensioners must get remove from de list. She didn’t check to see that she removing she self and Uncle Adam. One man seh that Sheila STP; She Totally Paglee!

Foolish like real fools, de Waterfall paper publish de story wholesale and even Uncle Adam didn’t see Shelia knock out he name. Now that Aunty Priya skin up Sheila, Uncle Adam begging fuh he name get back pun de list. He even ask Steve fuh help he. He name back now on since Aunty Priya remind he that de guvment always care fuh old people. Uncle Adam happy. He now STP; Stop Troubling Priya. He picking pun Jenny. She expose he and Glenn and de paper deficiency in Maths. Dem can’t divide as seen in de Laptop story.

Every time dem open dem mouth dem confirm dem membership in de paper “A” team. Another man seh that de paper “A” team merge with de All Fuh Crap. De name remain AFC; All Fools Congregation. De launch was last week.

Dem even had a video presentation. Dem show dem favourite movie; “Fools Rush In”. De benefit de paper “A” team getting from de real hOpposition was reveal at de launch. Is STP; Some Teking Pay. No wonder de “A” team always going to de bank. Dem should now STP; Stop Talking Pu..! Hmmm!