CN getting check with a remote?
BLUETOOTHERS know ‘bout getting things done without doing it. A man just gat fuh seh “bring me a beer” and it come. Whether at home or in de bar. In many cases de man ain’t gat fuh seh anything. When he come home, he clothes wash, he food cook and water full up fuh he bathe. In some cases it reverse. When de woman come home de man gat de house clean clean. Yeah. Some people really know how fuh get things done without doing it.

But some does want fuh carry it too far. Dem not just satisfy with having a TV remote; dem want somebody fuh bring de remote fuh dem!

Just like when de Coconut Tree party was in office, people use to vote by remote. When dem went to de polling station, somebody done do that fuh dem saving dem de trouble and de nasty ink pun dem finger. So it was plenty people who “vote” but gat clean finger! Now, people want others fuh do some strange things fuh dem.

A few weeks ago Uncle CN send he secretary fuh see de doctor fuh he. He went to de hospital and stay outside sending de young lady in. De doctor was confused because if he did find de lady had cervical cancer, how he gon put that pun CN chart! He know CN good, so he know he ain’t gat no cervix. De situation was ground-breaking. Some seh when people very rich dem can get others fuh do anything fuh dem. Is like “money talk and bull-dung walk”. People seh de man didn’t really sick. He was just trying fuh get a paper fuh seh he sick.

But why he didn’t send a man fuh “get sick” fuh he? Now people sehing all kinds o’ thing. One seh by sending a lady, CN probably trying fuh show that he is not “equipped” to do de things he gat charge fuh. Since plenty believe that he not really sick, dem convinced that he acting fuh avoid de court. Don’t surprise if de next time he go to court some people doing something fuh he. Dem gon set up a ER in de compound to confirm that he ain’t acting and that he ain’t gat a cervix! Ah wonder if dem gon use a remote fuh check. Interesting! Hmmm!