Rohee and Ramson expose “saint” Paul
People all over de world know that if dem is to stick to de dem religious beliefs, then everyday would be a “holy” day reflective of some sacred activity. Yuh gat days fuh Saint Patrick, Saint Jude, Saint Peter and so on. Here, yuh even gat St. Stanislaus and St. Joseph and St. Rose’s days fuh PTA meetings. Some dog owners does even gat St. Bernard’s day.

As another first, we are now de first place pun earth to have a living saint! To be a Saint, yuh gat to de dead and de process does tek plenty years. De last Pope ain’t turn Saint yet after deading suh long. So people want fuh know how come Paul “slow” turn “saint’ suh quick and he alive? People confused. Dem want to know if is jumbie dem seeing when dem see Paul walking slow.

Fuh turn a Saint, de dead person does gat to be canonized, which mean de “canonizers” must have proof that de person lived an honest, truthful  and holy life. Without any proof of honesty, de Waterfalls and Big Market papers jump and mek Paul a “saint’. Dem ain’t want fuh seh dat de “saint” Paul did teking gifts and wild meat from business people from GT in exchange fuh safeguarding dem interest. De two papers “cannoning” Paul speech at he farewell parade because he seh some things dem like hear; things that dem using to try and mek de force look bad.

But dem didn’t remember that Uncle Rohee did buy a big water canon. Suh he “canon” dem with “saint” Paul dereliction of duty and other things that will halt he “sainthood”. Ah don’t have to tell yuh know what water does do to paper. But before Uncle Rohee “water canon” dem, Uncle Ramson “fire” back at “rifle” Paul and “unsaint” he.

Bluetoothers seh that de “weight” of Uncle Ramson big words mek Paul fall down. While some people still trying to understand what Uncle Ramson really seh, it ain’t matter; Paul and he paper friends dem know. Paul is not de saint dem mek he to be. De two papers now rushing to withdraw de “sainthood” quicker than when dem “canonize” he and returning de canons dem rent fuh de farewell parade. Hmmm!