“Fandemonium”—DJ now got new meaning
De Bluetoother see that de “Fandemonium” turn to “pandemonium”. Ow, some people get pelt unnecessarily. It might sound like joke, but is seriousness when something like that happen in a crowded place. It could have been more serious. When something like that happen blame does fly just like how de bottle was. Look how blame flying after de cruise ship accident in Italy. De people blaming de captain and de captain blaming de rock in de river. De Italian police got he pun “cruise control”. Back here, de “Hits” people who always causing a “Jam”, decide fuh give back to dem fans who does support dem before APNU call fuh boycott.
Now, de “Fandemonium” thing ani’t new. Plenty thousands does always support de “Hits” people events which yuh does have to pay to go in. So, as a show of appreciation, de “Hits” people hold a free show and decide fuh give away more stuff than what dem stores got.
From de time some people hear free, dem reach faster than minibus. Some even rush out with curlers in dem hair and without make-up. De place full up fast fast. Big crowd gather. APNU vex. Dem boycott get boycott. When yuh enter, yuh get popsicle and other things. Things start going good. Big party while some collecting TV and laptop.
Then it happen. Some seh that de DJ tell dem fuh throw things in de air. Some unruly ones tek advantage. Dem throw what dem got. Bottle, glass, stocking, old shoe and so on.
But it was be bottle that cause de problem. It mek out o’ glass and it heavy. It does injure serious. When de throwing start, de “Hits” people had difficulty to control de crowd. Dem even ask Adrian and Jomo, who got plenty hits, to help. That bring more hits; bottle hits that is. De unruly section cause plenty panic. De police tear gas dem. Everybody scatter. De speed was X2!
People want fuh know if de disorderly set was sent deliberately to pelt and bruk up! After all, dem know how dem who does call fuh boycott does operate. People does run and stores does close up when dem coming through. De “Hits” people seh some people gon never change.
Dem only got hatred and always want fuh bruk up. Just like how de Palm Tree Party bruk up de country and still trying to do so with it “hands”. Anyway, given what de DJ seh, people sehing that de meaning of DJ should change from Disc Jockey, to Dunce Jockey! People want fuh know how come he ain’t get pelt! Hmmm!