Glenn should hire Bheri
Bluetoothers jamming. Dem in Jamzone mode. Two days now dem asking, “weh de punchin deh”. Dem ain’t realise it done. Dem boys drink all. Dem buying more though. Dem now preparing fuh Mavado and Yo-Yo, …oops, sorry, Ne-Yo. At de end o’ de week a Queen gon crown. De “punchin” posse asking to de same tune o’ de song; “weh de girls dem deh”. Is plenty people singing different songs to de same tune. GT people singing to Hammie, “weh de money deh”.

Uncle Bharrat mek Hammie singing happily, “weh de garbage deh”. As de cricket team prepare fuh South Africa, some singing, “weh de Tiger deh”. Last week Pakistanis did singing, “weh Zardari deh”. Now dem singing, “weh de aid dem deh”. People reading de Waterfalls paper does be singing, “weh accuracy deh, oh..oh..oh”. Last week de same paper had stories ‘bout two people from de Justice sector getting charged fuh traffic offence.

Nothing wrong with carrying de stories. It show that de police doing dem wuk. It show that no former Judge nor a sitting Magistrate is like de Steven Segal movie, “Above The Law”. De problem is that de paper story different from what de two people in question seh. Sound familiar eh? De former Judge and de Magistrate had to write and correct de paper. Now this is nothing new fuh de paper. Dem get it wrong suh much that dem gat a permanent apology fuh when needed.

When people give false testimony in de court it means dem not credible. Now that two Justice people get a “taste”, de pronouncement that de paper lack credibility loud loud. Maybe Glenn should hire Minister Bheri suh that de paper can “get it right”. If not de song gon continue, “weh accuracy deh, oh..oh..oh”. While people singing, Glenn stop. Now that Fip coming, he can’t sing he old song, “weh Fip really deh, oh..oh..oh”. Hmmm!