Is not only Uncle Joe could build
Bluetoothers remembering dem primary school days. De building boom all across de country meking dem remember. Dem remember de days when only Uncle Joe and a few others like Uncle Rich, Aunty Lucky and Neighbour Canafford could build a house. Dem was privileged people. Dem was de days when things was scarce like a decent Mini-bus driver today. Then, when things was available, only Uncle Rich could buy.

Time move. Friday gone mek quarter of a century since Uncle Forbes final good-bye was said. Twice. De moving time see plenty changes. No longer one Uncle in de village gat a car; an old one with smooth tyre and shooting black smoke. No longer one grocery shop serving ten villages. No longer only twenty-five people could afford to buy TV. No longer de twenty-five people gat to get a “black box” fuh de-scramble de one TV station signal. No longer only de four people mention can build a house.

Bluetoothers can sit whole day till Noah Ark get find and Bluetooth plenty thing that Guyanese no longer getting starve from. Almost everybody gat a car. Some 2. Now some people complaining how much vehicles it gat! De traffic jam plenty. Parking had to find like de Ark. Drivers always speeding since people always gat somewhere fuh go. Night clubs and parties and sporting events now bountiful. Everybody gat TV. Some gat four. Supermarkets now deh all over.

De plenty house and cars mek people remember de days when dem punish fuh move about and fuh shelter dem head. Uncle Irfan Building Expo show how de place transform just in de last fifteen years! House now easy fuh own. Is almost everybody gat a house lot. Dem building mansions. Suh, if yuh see a set o’ men walking with bag oven dem face, know is Uncles Freddie, Adam, Glenn and dem two other colleagues. Dem bagging dem face in shame since dem always sehing nothing good ever happen over de last fifteen years. Yet dem don’t use a flambeau fuh lights and a donkey cart fuh travel. Dem gat Lexus and Tundras. Hmmm!Almost everybody