De ‘sewers’ get sue
Bluetoothers fed up ‘o de big oil spill in de gulf. Plenty tons of barrels of oil leaking over eighty-five days now. With the quest fuh oil, it is unbelievable that de gulf didn’t get invade fuh de oil that floating! Everybody talking, but nobody really doing. Even Barrack seem powerless to stem de flow. With all de technology dem gat, a lil hole in a pipe down in de water can’t get plug.

If Guyanese did get de contract, de hole would a get plug. Dem would dive down without scuba gear and put a piece o’ ura-band or a piece o’ round wood in de hole. Dem would even bring back all de oil here leffing de gulf clean! We gat things here too that leaking and messing up de place just like de gulf oil. We gat Uncle Freddie miasmic mess that always spewing in de sewer, oops….de Waterfalls paper.

Since he and Uncle Glen didn’t get what dem want, dem “invested” in infesting de country with miasmic waste in de paper. To cover it up, dem seh de “investment” is in “alternative fuel” which does come from miasmic material. Dem mek fuel; de one that fuelling hatred, racism, sensationalism and bad mouthing de country. Dem hiding behind de freedom to invest. People get fed up with de miasmicness in de paper just like dem in de gulf.

So, Uncle Bharrat, being de leader of de people, tek action fuh plug de mess coming from de paper. De court “plug” up Uncles Freddie, Adam and Glen. Knowing de amount o’ miasmicness in de three o’ dem, it can’t stay in. It bound to come out when dem open dem mouth. So don’t expect de smell to disappear right away. What yuh can expect is Barrack calling Uncle Bharrat fuh help plug de gulf leak. Hmmm!