Oldness hard fuh accept
De other day Uncle Bharrat mentioned ‘bout de five old men who always sehing negative things ‘bout de country.
He ain’t call no name and as old people does seh, “no name, no warrant”. So how come right away then Uncle Freddie friends Bluetoothing and asking he if he is one a’ de old men? Uncle Freddie get vex and start fretting up like when some old people does get offensive and seh age is just a number even though de number high high and can’t use fuh de Lotto. Uncle Freddie seh how people trying fuh “nasty” he. While somebody literally did that with de miasmic thing, how come he own friends seh he old? Uncle Freddie denying he ain’t. So is like he seh and dem seh.

Freddie like it suh. He like to seh. He now pointing fingers to other old people. De first finger he point was to de person right next to he; Uncle Adam. Dem boys that does lime in Saffon Street seh that Uncle Adam did help Noah to build de ark while Uncle Freddie was in-charge of finding de animal pairs.

Dem same set o’ boys seh that is since then Uncle Freddie “miasmic” cause he had to check “certain” places of de animals to confirm their gender. De animals didn’t tek too nicely to his “probing” so dem “miasmatise” he. Dem boys wicked! Dem Bluetoothing and seh that is why Uncle Freddie always surrounding heself with miasmic things like he daily column. Anyway, both Uncles, Freddie and Adam, seh that deh trying to cope with de oldness and that de only “hard” thing fuh dem is to accept that deh old.

To look “good”, deh seh how Uncle Chris Ram is de oldest of de five. He so old that he can’t hold up he pants. He gat to use dem suspender things. Wonder who is de other two. Any guess? Bluetooth me. Hmmm!