Glenn seh Adam does clean drains
De Bluetoother was off fuh a while. Couldn’t bounce. De flu. Don’t know what it was. Chicken, swine and dengue was ruled out. A colleague seh is Adam flu. It ugly. When exposed to that kind o’ ugliness, yuh does get flu-like symptoms. Somebody with a strong stomach mek a bogus press pass fuh Adam. De pass maker use a photo which he/she think best represent Adam. Adam vex. He always sehing how he ain’t gat a pass. Now somebody present he one, he seh it too ugly. Yuh can’t blame photo fuh natural appearance!
Glenn and Adam and Gordon seh GINA mek de pass. If that is true, then Adam is a pick-pocket and a drain cleaner! Not de Bluetoother seh that. Is de Waterfalls paper Monday gone seh so. Page 9.
De paper claiming that GINA does give plenty people including pick-pockets, drain cleaners and weed cutters pass. So if dem believe that de pass come from GINA, then by logical deduction, Adam is a felon that does clean drain and weed grass. Old people does seh, “mouth open, story jump out”! is that why de paper always focusing pun crime?
Adam now vex with Glenn and Gordon. He never thought that he fellow PNCR/AFC buddies would put he down so low. He thought with all de dutty wuk he doing and de misinformation and lies he does spread in the Waterfalls paper, at least Glenn would a “big” he up with better titles other than pick-pocket and gutter cleaner.
He thought Glenn would use big-word titles like “Sensationaliser”, “Misinformer”, “Opposition Spokesperson”, “Anti-government Crusader” and so on.
A Bluetoother want fuh know if is a GECOM cameraman tek Adam photo that deh pun de pass that de Waterfalls paper publish. Is Adam and he boys did seh that de Kingston camera people does mek yuh look more ugly.
Is dem seh. A Bluetoother seh she understand why Glenn didn’t give Adam de “big” titles mention. Glenn gat dem already! Poor Adam. He now gat distrust fuh Glenn.
Don’t be surprise if Hammie give he wuk fuh weed bush and clean drain. After all a comrade does help a comrade. Hmmm!
