Profile raising and pants dropping
BLUETOOTHERS and others getting to see royalty again. De PM o’ Kuwait is here. Since this guvment, royalty coming steady. De Queen, Prince Charles and so on. We gat we own royalty too. Dem plenty pageant queens. De problem with this kind o’ royalty is that dem never coming. Dem always going as a contestant to de Miss World and so on, but don’t know when dem come back.
Anyway, de fact dat royalty now plenty here show that de country gat international presence. Outside people now know good things ‘bout de country. Remember de times when de Coconut Tree party run down de place and nobody ain’t want fuh come? Remember when plenty outside people didn’t even know de place exist? Remember when de only thing dem did know was Jonestown?
Well dem times dah gone. Uncle Bharrat wuk hard fuh let de outside people know here fuh good things. He hard wuk and end up with de Champion award he get from de same outside people. He leading de way fuh help save de planet. He and de country now well known. This “well known” is known as “profile raising”. De profile high so that de royalties can see it. Dem wouldn’t come if things did bad as how dem boys from de Waterfalls paper does mek it.
Dem boys ain’t know ‘bout profile raising. Some seh dem ain’t know ‘bout raising anything. A Bluetoother seh that yuh gat fuh gat something to raise in order to raise it. That explain why dem boys thing always down! Dem always playing down de plenty progress that tek place. Dem always pulling down de country. Dem always playing down till one get catch with he pants down! If yuh see dem with plenty yeast, don’t be surprise. Hmmm!