GT Bluetooth
Bluetoothers know de set o’ boys who does be “liming” by a fabricating plant in a South-West street in GT. Dem boys love to seh and whatever dem seh does end up in de fabricating plant end product; de Waterfalls paper. De way dem boys does seh mek ladies in a hair saloon get dumb. While de boys dem now free to seh what dem want, it gat certain things dem don’t seh at all. Dem don’t talk ‘bout dem boss man involvement with a big generator that disappear from a certain place and end up in a certain Regent Street store. Only a forklift could a move de blackout relief mechanism fuh it to get pun a truck. Truck and forklift does mek plenty noise. Suh is either deaf people did wuking at de place of removal or “something” else mek dem conveniently deaf!

Dem not talking ‘bout dem rich friend who is not a drunkard but who love twelve-year old. This twelve-year lover gat two set a books even though, as a Bluetoother seh, he can’t read and write properly. He staff dem does gat fuh sign in both fuh dem salary. Is ‘bout de only place where workers does gat fuh sign two times fuh de same money. Dem don’t even get to see what dem signing.

One book, which does get hide, gat de real salary and de other one which de Tax man does get, show de staff dem only wuking fuh lil bit money. This is how de man “kacking” de system by avoiding taxes and getting more rich. Another one who everybody think would a get “straighten” out after sixty months in Camp Street, gat nothing to do and whole day to do it and yet driving plenty big expensive gas-guzzlers vehicles. How he get it? It look like prison does pay plenty money with interest! Talk about “talk half and lef half”! Hmmm!