GT Bluetooth
DE Bluetoother is news buff just like plenty others. Now that plenty people gat cable, is plenty flicking from Aljezera to BBC to CNN and suh. Plenty time de whole news is ‘bout problems in other countries. Some place gat plenty crisis. If is not a bomb blowing up in Iraq or Pakistan, is problem in Palestine with Israel or de Koreas at each other and de list go on. Recently, is plenty protests pun TV, from Tunisia to Egypt to Yemen and Jordon and that list also go on.

Is sheer crisis out deh. De current crisis follow de financial crisis. Every now and again, unfortunately, is earthquake, hurricane, snow or flood crisis. If is not that, is tribal crisis in parts o’ Africa. Haiti, which always seem do be in a crisis, still suffering from earthquake related syndrome. Is crisis pun crisis. Here, we just get a crisis; a NO crisis. De fancy people from de EU, short fuh European Union, seh a big NO to de country. De NO spell in capital; N-O. We get a NO fuh having no crisis.

De EU Ambassador man here seh that Union not sending anybody fuh observe de upcoming elections. De man seh de decision is because de country nice and stable and ain’t gat no crisis. Now is not Uncle Bharrat or he Ministers or Kwame or Prem sehing suh; is de big EU sehing suh. De EU gat EU. Dem gat Every Understanding that de country crisis free. De country didn’t even get de financial crisis and it don’t get hurricane and earthquake and so. De same EU man seh that because de country democratic and de people mature and free, no need fuh observers.

We don’t need dem fuh things like that. De Waterfalls paper and its naysayers ain’t like de NO. Dem so accustom sehing NO, No progress, No this, No that, that dem ain’t expect somebody else like de EU fuh seh NO. By sehing NO, de EU mek de paper and Freddie and dem bosses in de hOpposition who always bad-talking de country, look like big fat liars! One o’ dem own boys seh how Glenn, Freddie and Adam screaming “NO, NO, NO. How can dem seh NO”. That is de only word dem sehing. Dem even sehing NO to things that suppose to be “YES”. Look fuh dem apologising to dem spouses! Hmmm!