GT Bluetooth
De Bluetoother did mention how Sheila from de All Fuh Crap (AFC) ‘holding’ on that thousands o’ pensioners must stop getting money. Another ‘craper’, noted fuh suspenders, join she. Now is two ‘crapers’ sehing de same thing. A Bluetoother seh that this two ‘craper’ went fuh spread dem ‘message’ to de pensioners while dem was receiving de 2011 increase in pension. At first, nobody ain’t recognise de two and tek dem fuh two new pensioner and allow dem to go to de front o’ de line.

When dem tell de clerk person that de pensioners mustn’t get dem money, was ‘hell bruk loose’. Who tell dem fuh seh suh. De plenty old people use dem stick and umbrella and run dem out. One old man even tek he spare false teeth and pelt dem while another manage fuh loose de suspender from de male ‘craper’. If yuh see he run with he pants at he ankle. It look like de time when he get catch with he pants down during a GT hotel fiasco that he was involved in. He run and leff Sheila trailing behind.

She try fuh hold on pun he with two hands, but with he suspenders gone she had nothing fuh hold pun. She keep running with she hands flapping. Another Bluetooher seh she look like if she trying fuh catch a straw that was floating in de air, just like she argument in de Parliament. De suspender ‘craper’ is a ‘means’ man. He want pensioners must tek a “MEANS” test fuh see if dem qualify fuh get pension. He Coconut Tree party use to do that to de old people who wuk hard fuh build de country.

Uncle Bharrat party scrap de test and seh as long yuh reach de age, yuh gon get de money. Automatically, de Coconut Tree party and all in de All Fuh Crap qualify. Now that dem ain’t gat to do any test, dem glad. Dem was never too ‘bright’ anyway. De suspender man and Sheila ain’t gat a heart. How could dem want fuh treat old people so? No wonder dem running. De pensioners run dem out. Dem running like Bolt. Don’t be surprise if yuh see dem representing de country at de next Geriatric Olympics. Uncle Adam gon be dem manager. Hmmm!owHow