GT Bluetooth
De Bluetooth is really tickled at de unedified nonsense that come out de mouth o’ de man who is suppose to be de “bass” fuh de Teachers union. De way de Bynoe boy talk he diagnosis easy fuh mek; Foot & Mouth disease. De only problem is that he mouth far bigger that he two foot. He seh that de ain’t like how de police arrest a teacher who is accused of having sex with an underage student. He seh how de police should arrest de man after school or at he home. Now, Colin, de Bynoe man, was a MP fuh de Coconut Tree Party, suh when he talk he does sound just like it coming from that Party. De story was already out and who know if de sex teacher would a hide and not go home. De police do dem wuk. Dem visit de crime scene and arrest de suspect. Big ones in de force from that area turn up and supervise de arrest so that people like Bynoe can’t seh that junior ranks harass people. People like Bynoe and he Coconut Tree cadres like bad talk de police.

What he want? He want de police fuh turn up with “escort girls” and tell de sex teacher that he just win a prize of unlimited stay at a posh guest house compliments o’ de state? Or he want Tassa and African drums fuh escort de teacher? De man is accused of a serious offence. Did de Bynoe boy ever tell de teacher that he must turn he self in? If he suh concern ‘bout the children seeing de police then he should a tek de man to de station since de story bruk!

If de police didn’t do anything de same Bynoe would a chastise dem in de media. How come only Bynoe and nobody else ain’t gat a problem wid de arrest? De teacher suppose to protect and safeguard de child. Now it look like Bynoe want fuh safeguard de teacher! De police right. Arrest culprits who prey pun children.

A Bluetoother seh that since all de MPs getting media coverage due to de Budget, Bynoe feel left out since he no longer in de House. Maybe Beri should offer he help to get a “Mouthaitrist” fuh de Foot and Mouth disease. Hmmm!