GT Bluetooth
De Bluetoother did mention before how some people does get pay fuh bad-talk de guvment and de country. One particular paper does steady get accuse of spending plenty fuh get information. When dem publish it, de negativeness gushing like a waterfalls. E-magine, dem can’t find negative things pun dem own fuh publish suh dem resort to paying fuh it. Of course dem gat people that would tek money fuh seh anything, even if is lie. That is why plenty times de paper does gat fuh apologise. Only de other day de Tax Boss had reason fuh seh that de same paper might gat Tax staff pun dem payroll just fuh provide information. Some in de media did suspect long now that de very same paper does pay fuh information relating to crime. Yet de paper Boss and he miasmic columnists does accuse others of lacking in ethics! E-magine!
Just two days ago Uncle Randy hit de nail pun it head. Now a can’t speak fuh Uncle Randy carpentry ability, but when he write two days ago sehing that some people does mek a living bad-talking de guvment and de country, it shows that he gat good hammering skills. Now de Bluetoother and Uncle Randy didn’t exchange views. Uncle Randy deh up North and de Bluetoother deh down South. It just show that is all over dem boys bad-talking ability well known.
Whenever dem boys open dem mouth, is de same response, “nay”. Everything is “nay, nay”. That is de only word dem know even though all o’ dem old more than geriatric! De way dem does talk is like if dem gat a severe speech impediment. No other word does come out. When good things happen, dem seh , “nay, nay, nay”. When dem see Glenn is “pay, pay, pay”. It look like dem gon always be sehing, “nay, nay, nay” since plenty plenty more good things gon be happening. Hmmm!