De Waterfalls paper adore garbage
Bluetoothers know garbage when dem see it. It not only in piles in de leadership at Sh***y City Hall, but mountains at de Waterfalls paper Dumpsite Head Office. Since de garbage pile up weeks now and mek de city look it gat mountain ranges, de Waterfalls paper never carry any story that would expose de uselessness o’ de overripe Mayor.

De paper ain’t want it friend look bad despite everybody knowing that de Mayor more obsess with travelling overseas than cleaning de city and paying de workers. Suh dem hush up stories ‘bout de stinking stench city residents smelling weeks now. All of a sudden, boom, de garbage story mek front page news in de paper on Tuesday, July 19, 2010! De garbage picture deh bottom of a picture showing de PM o’ Kuwait and Uncle Bharrat.

Plenty Bluetoothers “bouncing” messages ‘bout de paper wickedness fuh putting de garbage picture when de Kuwaiti royalty visit. Dem see it as a deliberate attempt fuh try and embarrass de country since dem outside people ain’t know de Mayor but  know that dinosaurs extinct. But another Bluetoother reminded others that embarrassing Guyana is nothing new to de Waterfalls paper.

De more dem try fuh embarrass, de more de country prospering and because it prospering dem want fuh embarrass it. When de country look good, dem look bad. Just like an opposition party. No wonder Uncle Prem seh that de paper and it few friends is de “new opposition”. When yuh like something yuh don’t oppose it, right? That is why dem never oppose de garbage. No wonder Uncle Freddie feel at home at de paper. Hmmm!