Hammie like a stink
City Bluetoothers can’t tek de smell anymore. No is not de scent of de rat dem always smelling in City Hall. Is de stinking stench from de plenty garbage that Hammie ain’t pick up. Year in, year out is de same thing Hammie giving city people; plenty garbage. Whenever he talk to explain, he add to de heaps.

Somebody seh garbage is nothing new to Hammie. He was PM in de Coconut Tree party that did sheer garbage when dem was in office. Desi throw he out fuh doing garbage during de 92 election. He “good and green” party turn garbage. Plenty people leff City Hall cause dem couldn’t tek he garbage. One Bluetoothet seh if Hammie had business sense he could mek plenty money from methane gas given de never-ending amount o’ garbage he gat.

But how come City Hall never gat money and dem always collecting taxes? How come Hammie always travelling but de garbage trucks park? How come he always asking de guvment fuh bail out de City and he does still badmouth dem? Eh? How come? Somebody Bluetooth me and seh that de next time guvment bail de City out, dem must mek sure that Hammie get bail out and he stay out.

How come dem boys ain’t talking ‘bout de stinking City? If guvment was in-charge o’ City Hall everyday pictures with garbage piles would appear in de Waterfalls and Big Market papers. But Hammie is dem pal. It look dem like de stink just like he. Garbage does attract garbage, eh! When yuh look at how Hammie running down de place, yuh get an idea of what de Coconut tree party did to Guyana for almost three decades. No wonder he get tek back. Garbage does feel at home in a dump site. What? Yuh smell more rats? Hmmm!ow come Hammie always travelling?